Официјална Тирана побара од македонските власти да ги расветли и да побара одговорност за лицата кои извикуваа антиалбански повици на прославата во Крушево.
„Албанија изразува жалење и го осудува говорот на омраза, расистичките и антиалбански извици што се случија на празнувањето на востанието на Илинден на Мечкин Камен во Крушево. Веруваме дека овие активности се дело на помала група луѓе поттикнати од националистички и екстремистички идели и веруваме дека ваквите активности ќе останат изолирани“, се нагласува во соопштението на албанското Министерство за надворешни работи.
На крајот на реакцијата на албанското Министерство за надворешни работи и Европа се наведува дека Албанија и Албанците биле и остануваат засекогаш пријатели на Македонија. Притоа се додава дека Албанија верува во вредностите на сожителството, хармонијата и соработката помеѓу нашите две земји и граѓаните кои живеат во нив.