Во Собранието почна средбата меѓу премиерот и лидер на СДСМ Зоран Заев и претседателот на опозициската ВМРО-ДПМНЕ Христијан Мицкоски на која ќе се обидат да најдат решение за Законот за јавно обвинителство, а со тоа и за статусот на Специјалното јавно обвинителство.
Покрај Заев и Мицковски, на средбата се присутни и министерката за правда Рената Дескоска и претставниците на работните групи од СДСМ и ВМРО-ДПМНЕ.
Премиерот Заев денеска изјави дека очекува на средбата со Мицкоски да биде покажана одговорност и да се направи обид за решавање на прашањето со Законот за јавното обвинителство. За инсистирањето на опозицијата да се разговара за предвремени избори, Заев истакна дека тоа е легитимно барање, но нагласи дека ова е неповторив период кога фокусот треба да се стави на полноправното членство во НАТО и почеток на пристапните преговори со ЕУ.
Последната средба на работните групи на власта и опозицијата за законот, која се одржа минатата недела не вроди со суштествен заклучок, а сега се очекува решението да се бара на лидерската средба.