„Папата Франциск дојде во прва историска посета на нашата земја. Тој нѐ посочи како светол пример за мирен соживот, земја со огромно културно богатство, огледало на најважното и најценeтотo наследство-мултиетничкиот и мултирелигискиот состав на народот. Ова е важно за побрза интеграција кон европските земји и поттикнување што поголема почит кон различностите и човековите права во целиот регион.“ – порача новоизбраниот претседател на РСМ Стево Пендаровски.
Тој исто така потсети и на значењето на Светата Мајка Тереза.
„Света Мајка Тереза беше заштитник на сиромашните, таа не познаваше различности, само луѓе на кои им треба помош и насока. Пред нејзиниот споменик се поклони и папата Франциск, а ние ја имаме таа чест да кажеме дека е родена во нашиот град. Со почит кон нејзиното големо дело имаме и одговорност да изградиме обединета и хумана држава. Солидарноста е најголема доблест на еден човек и на секое општество.“ – напиша Пендаровски на својот ФБ профил.
Во текот на денот Пендаровски на својот ФБ профил објави и една мисла од папата.
„Рамнодушноста и клеветите да се заменат со чувствителност и надеж, да се надминат стереотипите и повеќе да се грижиме еден за друг“ – папа Франциск.