Владите во Грција и Македонија бараат начин за забрзување на решавањето на деценискиот спор за името, објавува германската новинска агенција ДПА повикувајќи се на владини извори во Атина.
Од добро информирани дипломатски кругови во Атина, ДПА дознава, дека се создава „нова динамика“ во спорот. Но, оттаму предупредуваат дека е тешко да се очекува брзо решение, односно порачуваат дека не треба да се очекува решение „од денес за утре“.
Истите грчки дипломатски извори за ДПА наведуваат дека „САД притискаат за решение и брз влез на Македонија во НАТО, за да се запре руското влијание во Македонија“.
Како решение се предлага одредница пред името Македонија, како Горна, Нова или Северна Македонија.
ДПА пренесува потврда од кабинетот на Ципрас за одржаниот телефонски разговор меѓу македонскиот и грчкиот премиер Зоран Заев и Алексис Ципрас.
Заев претходно за македонските медиуми соопшти дека неколку пати телефонски разговарал со Ципрас и со грчкиот министер за надворешни работи Никос Козиас за време на неговиот новогодишен престој во Солун.
Деновиве и двајцата премиери во јавни настапи изразија умерен оптимизам за решавање на деценискиот спор меѓу двете земји.
„Оптимист сум дека можеме ефикасно и одговорно да управуваме со прашањето кое го наследивме од претходните влади. Се додека од другата страна навистина постои желба да се направат чекори, останува да го видиме тоа, верувам дека може да се направат чекори кон излез од безизлезната ситуација“, изјави Ципрас во интервју за грчкото радио „Реал ФМ“. Но, тој предупреди дека зборовите сепак треба да прејдат во дела.
Заев најави дека во првата половина на 2018 година, Македонија е подготвена „вистински и суштествено да навлезе во решавањето на проблемот со името“ и изрази уверување дека е можно да се најде решение.
Во новогодишното интервју за ДВ, Заев рече дека „може брзо да се дојде до решение“, доколку се продолжи да се работи во „атмосфера на добра волја, политичка зрелост и подготвеност за надминување на ова прашање“.
Извор: Дојче веле