Обвинителката Вилма Русковска на судењето за упадот во Собранието на 27 април, во воведниот говор рече дека според обвинението, Игор Југ требало да го ликвидира Зоран Заев среде мешаницата.
Како што рече, од доказите приложени до судот, ќе докажат дека поранешниот директор на БЈБ Митко Чавков знаел уште од почетокот за сите случувања.
Таа додаде дека кога толпата веќе била влезена и кршела во Собранието во 20 часот, Митко Пешов, началник на одделот за специјални единици во МВР, наместо да добие наредба за интервенција, од командантот на ЕБР, Марјан Цветановски добил наредба за состанок.
Русковска рече дека ниту началникот во МВР за специјални операции, Душко Лазаров, не презел ништо откако тогашниот министер за внатрешни Агим Нухиу побарал специјални полициски сили за извлекување на пратениците од Собранието.
-Златната команда пишувала докторат, сребрената не била во Скопје… Команда без команда, рече обвинителката и додаде дека Абдулфетах Аљими, вработен како обезбедување во Собранието, не презел ништо, гледал мирно како пратениците ги насочуваат насилниците и му ги дал клучевите од средната врата на Горан Ѓошевски – Леви, шефот на обезбедувањето на Трајко Вељаноски. Леви, според Обвинителството, добивал наредби од Чавков.