Обезбедени се 10 милиони евра преку Европската банка за обнова и развој за рехабилитација и проширување на патната делница Крива Паланка – Деве Баир (граница со Бугарија).
Дополнителни 2,6 милиони евра ќе бидат обезбедени како грант средства преку инструментот „Инвестициска рамка за Западен Балкан“ на Европската унија. Со ова ќе биде затворена финансиската конструкција за рехабилитација и проширување на 13 километри од Коридорот VIII.
Министерството за финансии изготви предлог закон за гаранција на заемот од ЕБОР, кој е влезен во собраниска процедура. По усвојување на законот од Собранието, ќе се склучи договор за заем помеѓу Јавното претпријатие за државни патишта и ЕБОР.
Заемот е под исклучително поволни услови. Каматната стапка е шестмесечен ЕУРИБОР плус 1%, додека рокот за отплата на заемот е 15 години, со вклучен грејс период од 3 години.
Ова е нов чекор кон унапредување на патното поврзување меѓу Македонија и Бугарија. Заедно со новиот експресен пат Ранковце – Крива Паланка, оваа делница ќе обезбеди современо патно поврзување со нашиот источен сосед. Се очекува меѓународниот тендер за избор на компанија што ќе го реконструира патот да биде објавен до крајот на годината, велат надлежните.
„После долги години на инфраструктурна и економска изолираност на мојот и наш убав регион, оваа Влада на РМ , преку поддршката од претседателот Заев и голема посветеност на моите колеги министри, на нивните тимови и надлежните институции обезбеди целосна поддршка за сите крупни и приоритетни проекти за овој крај и за нашето поврзување со Европската Унија. Последно во низата, обезбедени се 10 милиони евра прекуЕБОР за проширување на три ленти и целосна рехабилитација на делницата Крива Паланка – Деве Баир. Ова е историска можност за економски развој, подобар живот и отварање трајни перспективи за граѓаните од овој дел на нашата убава земја.“ – напиша на својот ФБ профил Љупчо Николовски, Министер за земјоделство, шумарство и водостопанство, кој потекнува од овој регион.