Министерот за земјоделство, шумарство и водостопанство, Љупчо Николовски го изрази своето задоволство од годинешниот 12-ти работен состанок на Министрите за земјоделство од Југоисточна Европа, кој што се одржа во Струга, а домаќин беше македонското Министерство за земјоделство,шумарство и водостопанство.
“Присуството на неколку вицепремиери, шест министри, пет заменици министри и државни секретари, директори на агенции, советници, високи претставници на Европската комисија и на други меѓународни организации потврдува дека сме во фокусот. За прв пат имавме и делегација од Република Грција. Македонија ја предложи и заеднички ја усвоивме декларацијата од Струга за воведување на зелени премини за брз проток на земјоделските производи во регионот. Успехот на нашата ИПАРД програма од оваа година со склучени рекордни над 940 договори од околу 18 милиони евра беше една од клучните теми. Вложуваме во регионалната соработка и градиме пријателства за нашите граѓани.” – потенцира Николовски.
