Специјалната обвинителка Катица Јанева, на презентацијата на ОБСЕ оцени дека ВМРО-ДПМНЕ најкомотно ги воделе телефонските разговори во периодот од 2008 до 2015 година, точно додека траело незаконското прислушување во УБК. Како што рече, од тоа што го слушнала во разговорите кои се дел од доказите, утврдила дека членови на владејачката партија разговарале на сите теми, а тогашните опозиционери се сомневале дека ги прислушуваат и биле претпазливи.
Јанева додаде дека за поранешната опозиција нема индиции дека сториле кривични дела и дека треба кривично да се гонат.
За прислушнувањето, како што рече, СЈО има многу докази дека обвинетите во случајот „Тврдина-Таргет“ прислушувале и обвинителите ќе го докажат тоа пред суд. Таа изрази надеж дека конечно во петок ќе почне судскиот процес за овој предмет.
– „Тврдина – Таргет“ е предмет за тоа дека службени лица од УБК ја уништиле опремата за да не може да се утврди дека на тие машини се прислушувало. Имаме форензичко вештачење во кое се утврдува кој, како и на кој начин прислушувал. Имаме докази во предметот што се уште не е почнат пред судот, а би требало да почне и се надевам дека сите ќе бидеме присутни да утврдиме кој прислушувал. СЈО има многу докази за тоа кој прислушувал и не може овој предмет да го даде на Основното јавно обвинителство, истакна Јанева, одговарајќи на прашања по денешната презентација на првиот преоден извештај на ОБСЕ за активностите и предметите на СЈО.
Најави дека овој предмет ќе го застапуваат до крај на постапката и оти имаат доволно докази за да докажат дека се злоупотребени личните права на граѓаните.
– Имаме докази дека лицата кои се обвинети, прислушувале и тоа ќе биде утврдено од страна на судот. Се надевам дека уште во петок за кога е закажано рочиштето, конечно ќе почне. Знаеме дека двајца од обвинетите се во бегство, но се надевам дека судот ќе се одважи и или ќе ја раздвои постапката или ќе ги суди во отсуство за да го започне овој предмет и јавноста да види како им се злоупотребени личните права. Имаме повеќе од 20 илјади луѓе кои незаконски се прислушувани и тоа ние ќе го докажеме на суд, нагласи Јанева.
За тоа колку од прислушуваните разговори се анализирани, Јанева рече дека се преслушани 85 проценти, а 15 проценти од разговорите кои биле на странски јазици се дадени на превод и овој процес на превод би требало да заврши до крајот на ноември.
За досегашниот тек на работата на СЈО, таа рече дека е задоволна од поднесените 15 обвиненија и додаде дека подобрена е соработката и со Обвинителството и со другите институции.
Сепак, ги критикуваше судовите дека многу бавно ги закажуваат рочиштата за предметите на специјалното обвинителство, но сепак не стравува од застарување бидејќи анализата на нејзиниот тим покажала дека се добро покриени.
-Во септември во судот е закажано само едно рочиште за „Титаник“. Иако Врховниот Суд нема конкретен рок за одлука сепак мислам дека во случајот „Труст“ ја злоупотреби својата положба и овластување со одлагањето на одлуката за притвор за обвинетите. Тоа им овозможи на Грујевски и Бошковски да добијат инсајдерски информации и да избегаат од државата, рече Јанева.
На крајот Јанева истакна дека ги прифаќаат приговорите на ОБСЕ и дека ќе закаже колегиум на кој истите ќе бидат разгледани.
Извор: 1ТВ