Еврокомесарот за проширување на Европската Унија, Јоханес Хан, во интервју за „Еуроактив“ ја издвои Македонија како позитивен пример одговарајќи на прашањето која земја од Западен Балкан постигнала најголем напредок изминатава година.
„Поранешната југословенска република Македонија, која ја надмина големата политичка криза со демократски средства“, одговори Хан.
Тој образложи дека земјата постигнала значителен напредок во спроведувањето на договорот од Пржино и реформските приоритети на новата Влада, а ги пофали и договорите со Бугарија и Грција.
„Значајни се напорите на Владата на премиерот Заев за добрососедски односи. По договорот со Бугарија, најпосле, по 27 години залудни напори со посредство на ОН, се најде решение за спорот за името помеѓу Скопје и Атина. Овој историски договор претставува значаен чекор кон реализација на евро-атлантската перспектива на земјата“, оцени Хан.
Еврокомесарот додаде дека е неопходен успешен референдум и ги повика политичките фактори во Македонија да работат за постигнување на целта наместо да го загрозуваат напредокот на земјата со дневна политика.
Хан, говорејќи за 2025 година, како можен рок за пристапување на земјите од Западен Балкан во ЕУ, потенцира дека датумот е многу амбициозен, но достижен.
За реформите во поглед на приспособување на стандардите на ЕУ, Хан укажа дека е потребно доста време бидејќи не станува збор само за законски промени, туку и за нивна практична примена. Еврокомесарот, во рамките на интервјуто, додаде дека Западен Балкан е опкружен со земји членки на Унијата и дека регионот ѝ припаѓа на ЕУ во географска, историска и културна смисла.