Со неколку пати тропање по масата кога пратениците си се вмешуваат во збор со повисоки тонови, без почитување на времето кое говорниците го имаат за зборување и без заинтересираност од претседателката да воспостави целосен ред, во полупразна сала поминува Комисијата за финансирање и буџет, на чиј дневен ред е предлог буџетот за 2020 година.
Пратеничката од опозициската ВМРО-ДПМНЕ Лилјана Кузмановска, која е претседателка на Комисијата, секој говор го поминуваше играјќи игри и допишувајќи се на својот мобилен телефон, без да се заинтересира во кој правец се води комисијата.
Нејзината колешка Магдалена Манаскова времето за говор пред пратениците и министерката за финансии, Нина Ангеловска го премина и повеќе од минута, но Кузмановска не изреагира на тоа. Тајмерот не се пушташе кога пратениците си реплицираа, а репликите најчесто одеа во друга насока, за пензиите, „Скопје 2014“, па дури и за престојните избори и листата на кандидати за пратеници, наместо за предложениот буџет.
Процедурално реагираше и пратеникот од нејзината матична партија, Драган Цуклев, кој ја потсети дека таа треба да ја држи дебатата за буџетот, а не да остава пратениците да разовараат на сите теми освен за буџетот, на што таа одговори дека ја прифаќа критиката, како и дека кога еден пратеник ќе го прекрши деловникот и ќе ја однесе дебатата во други теми, тоа го прават сите, но сепак не направи нешто за да ја врати дебатата на темата за која треба да се дискутира.