Министерот за здравство Венко Филипче на својот Фејсбук профил напиша дека срцето на хуманата сограѓанка продолжи да чука во градите на човек кој добива втора шанса за живот.
„Органодарителството е највисок акт на хуманост. Држиме среќа телото да го прифати новиот орган“, додава Филипче.
Министерот претходно посочи дека утрово, на клиниките за Кардиохиругија и Урологија започна трансплантација на срце и бубрези од починат донор. По интензивни подготовки во текот на ноќта, рано утрово беше завршена експлантацијата на срце и бубрези од донорот- 42 годишната пациентка која ја загуби битката со животот и чија последна желба била нејзините органи да бидат донирани. Трансплантацијата на срце се врши кај пациент кој подолго време е на листата за трансплантација, а бубрезите ќе бидат трансплантирани кај двајца пациенти на 40 сетина години кои се на дијализа. Почнувајќи од мај 2020 до сега извршени се експлантации од 7 починати донори, а трансплантирани се 5 срца, 12 бубрега, 1 коскено ткиво.