Високата стапка на јавен долг на земјава е резултат на владеењето на минатата гарнитура. Со вакво тврдење Министерството за финансии денеска го возвраќа политичкиот удар од опозицијата. Од 2008 до 2016 година долгот се зголемил двојно или од 23 проценти од БДП на 48,5 – тврди заменик-министерката Ширет Елези. На стартот на годинава биле исплатени околу 200 милиони евра долг преземен од минатите години.
Правиме напори до сите институции и ги притискаме да ги реализираат капиталните инвестиции, направивме одредени анализи и ако има потреба ќе се направи ребаланс на буџетот за да распределиме таму каде што мислиме дека има потреба од буџетските корисници за да се реализираат – изјави Ширет елези, заменик-министерка за финансии.
А, веднаш по објавувањето на податоците за состојбата со долгот на државата, опозицијата започна со секојдневни прес-конференции, обвинувајќи ја власта дека се задолжува, а парите не ги користи продуктивно.
Граѓаните тонат во долгови, не можат да врзат крај со крај, а СДСМ Заев, Анѓушев, Филипче, Шекеринска си делат народни пари по нивни блиски и фирми блиски до СДСМ. Само изминативе 3 месеци јавниот и државниот долг вртоглаво пораснаа благодарение на недомаќинското работење на СДСМ – рече Димче Арсовски, портпарол на ВМРО-ДПМНЕ.
Официјалните податоци на Министерството за финансии покажуваат дека заклучно со 2016 година, јавниот долг учествувал со 48,5 проценти од домашниот-бруто-производ, а на крајот на ланската година вкупниот јавен долг беше намален на 47,2 проценти. Последното задолжување на владата се случи вчера кога наместо планираните 32,5 милиони евра преку обврзници се повлекоа 36,6 милиони евра, односно државата се задолжи за четири милиони евра повеќе од планираното. Моментално јавниот долг надминува 5 милијарди евра или безмалку 50% од БДП.
Извор: Алсат