Стевчо Јакимовски откако смени повеќе партии и обавуваше повеже важни функции во земјава, денеска се соочува со кривична пријава за злоупотреба на службена положба како екс градоначалник заедно со неговите соработници.
БИОГРАФИЈА
Јакимовски е роден на 27 август 1960 година во с. Подржи Коњ, Кривопаланечко.
Дипломирањето на Економскиот факултет во Скопје во 1987 година.
Тој влегол во политиката во 1988 година, како стручно-политички работник во Претседателството на младината на Југославија. Оттогаш, тој бил на повеќе раководни функции, меѓу кои: министер за економија и министер за труд и социјална политика. Во текот на својата политичка кариера, Јакимовски променил неколку политички партии: најпрвин бил член на Либерално-демократската партија, потоа преминал во СДСМ, за подоцна да ја формира партијата ГРОМ.
Функцијата градоначалник на Oпштина Карпош, Стевчо Јакимовски ја вршел во периодот од 2000 до 2003 година, а потоа во 2009 година, повторно e избран за градоначалник на oваа општина. Првиот мандат како градоначалник Јакимовски го добил како кандидат на Либерално-демократската партија, втората градоначалничка функција ја освоил како кандидат на СДСМ, додека третиот пат настапил како независен кандидат.
Во 2013 година, Јакимовски ја формираше политичка партија Граѓанска опција за Македонија (ГРОМ), со која првпат настапил на претседателските избори во 2014 година, како и на предвремените парламентарни избори во 2016 година.
На локалните избори во 2017 година, Јакимовски повторно се кандидирал за градоначалник, како кандидат на ГРОМ.
Тој за својот ангажман е добитник на повеќе меѓународни награди и признанија.
ВО КАМПАЊА ГО ОБВИНИЈА ЗА ГОВОР НА ОМРАЗА
На 13.10.2017 година, на митинг во предизборна кампања, Јакимовски, во својот говор користи навредливи и деградирачки зборови со цел да го „нападне“ против-кандидатот, наведувајќи дека за него се зборувало дека е хомосексуалец. Притоа, посочува на хомосексуалноста, нарекувајќи ја „најопасната мафија“, „мафија која сака да се инсталира во Општина Карпош“. Ваквиот говор на кандидатот за градоначалник претставува кривично дело „Предизвикување омраза, раздор или нетрпеливост врз национална, расна, верска и друга дискриминаторска основа“ согласно член 319 од Кривичниот законик на Република Македонија. Хелсиншкиот комитет за човекови права на Република Македонија и Коалицијата Сексуални и здравствени права на маргинализирани заедници тогаш го осудија говорот на Јакимовски.
ЗА РЕФЕРЕНДУМОТ НАЈАВИ БОЈКОТ
„Секој патриот, секој чесен граѓанин, секој што држи до достоинството треба да им каже дека некои прашања не заслужуваат одговор. Референдумското прашање не заслужува одговор и народот треба да си ја гледа работата. Јас и мојата партија сигурно ќе го бојкотираме референдумот“- кажа тогаш Јакимовски.
Според него премиерот Зоран Заев и министерот за надворешни работи, Никола Димитров немаат мандат да преговараат за име – ерга омнес, тие можеа да преговараат само за двојна формула. Ова што е направено е надвор од рамките на државниот концезус, што значи дека тие мора да одговараат пред институциите, додаде тогаш Јакимовски.
Вчера обвини дека му се врши притисок затоа што најави бојкот. Кажа дека жив или мртов, сепак ГРОМ ќе бојкотира.
ЗА ШТО ДЕНЕС СЕ ГОНИ ЈАКИМОВСКИ?
Управата за финансиска полиција до Основното јавно обвинителство за гонење на организиран криминал и корупција поднесе кривична пријава против лицата С.Ј. во својство на Градоначалник на Општина Карпош, М.Д. – Раководител на Сектор за Јавни набавки, Н.Н.- Помошник раководител на Сектор за финансиски прашања, С.М. – Раководител на Одделение за норматива во Правен Сектор и А.С. – Раководител на Одделение за сметководство, поради постоење на основи на сомнение дека сториле кривични дела “Злоупотреба на службената положба и овластување” казниво по член 353 ст. 5 в.в. ст. 1 в.в. со Продолжено кривично дело член 45 и в.в. со Соизвршителство член 22 од Кривичниот Законик на РМ.
Јакимовски се товари за злоупотреби направени во 2012 и 2013 година.
Надлежниот обвинител во случајот со екс градоначалникот Стевчо Јакимовски, до судот поднел предлог на него и четворицата негови соработнии да им одреди мерки на претпазливост – повремено да се јавуваат во судот и да им се одземат патните исправи.
Сите се осомничени за делото злоупотреба на службената положба и овластувања.
По распитот во судот, од Кривичен треба да ја соопштат одлуката за мерките на претпазливост.
Извор: Фактор