После трикратното убиство во Дебар , полицијата трага по непознатиот убиец кој во неделата нешто после 20 часот ги усмрти Амит Поцеста (54), неговата сопруга Назиме Поцеста (53) и нивната 14 годишна ќерка Анила, потврдуваат од МВР.
Во дебарската полициска станица во неделата во 20,45 часот од страна на граѓани од фамијата на убиените е пријавено трикратно убиство во куќата на А.Поцеста на улицата 1 Мај а каде е извршителот на ова злостроство засега уште не е познато.
Се дознава дека се работи за семејство со потекло од Дебар кое веќе три децении живеело во Италија. За мотивите на убиството официјални потврди нема.
Од надлежното јавно обвинителство во Гостивар соопштуваат дека е извешен увид на местото на трикратното убиство, дека е наредена обдукција на телата на убиените, но дека полицијата интензивно трага по убиецот.
Од официјално непотврдени извори се дознава дека наводниот убиец е зет на семејството Поцеста. Оженет со сестрата на убиениот Амит Поцеста. Причината, наводно е банална – спор и недоразбирање околу користење на патот помеѓу нивните две куќи на улицата 1 Мај во Дебар.
Несреќниот пар Поцеста со малолетната ќерка биле на одмор во родниот крај а нивните две возрасни деца пред трагедијата заминале во Италија каде работеле.
Летниот одмор несреќниот брачен пар го продолжил поради веселбата на блиски роднини . Сега цела фамилија е во жалост.
Градоначалникот на Дебар вознемирено рекол дека ваков настан не е регистриран во тој крај во минатиот век.