Со изведување материјални докази денеска во Кривичниот суд продолжи рочиштето за предметот „Тортура“ на Специјалното јавно обвинителство во кое се обвинети поранешниот директор на УБК Сашо Мијалков, поранешниот прв човек на единицата „Алфи” Ивица Антевски – Пуки и уште петмина припадници на единицата, за апсењето на Љубе Бошкоски.
Адвокатот на обвинетите, Љупчо Шврговски, побара јавноста да биде исклучена од денешното рочишете бидејќи во снимките имало делови од приватниот живот на обвинетите.
На минатото рочиште оштетениот Бошкоски, на сослушувањето во својство на сведок, рече дека му е многу жал што се случил таков настан, и оти сака да го избрише од неговата меморија. Тој оцени дека апсењето било политички реваншизам што произлегол од неговите јавни настапи по напуштањето на партијата ВМРО-ДПМНЕ и формирањето на Обединети за Македонија.
Бошкоски рече дека ќе бара обвинетите кривично да одговараат, а за оштетното побарување ќе каже во текот на постапката.
Сите обинети пред судот се изјаснија дека не се чувствуваат виновни.
Бошкоски во изјава за медиумите прашан колкава материјална штета ќе побара, рече дека тој не е тука за материјална штета, туку за штетата која му била нанесена наму, на неговото семејство и на неговата политичка партија од, како што го нарече, полициско-политичкиот монтиран процес.