Поддршка на политиките што водат кон евро-атлантски интеграции на земјава била изразена на средбата што денеска ја оствариле претседателот на Владата, Зоран Заев и амбасадорот на Кралството Холандија во Македонија, Ваутер Пломп, соопшти владината прес-служба.
„Очекувам мнозинството граѓани да гласаат за евро-атлантска иднина на Македонија на претстојниот референдум“, истакнал премиерот.
На средбата, соопшти Владата, било констатирано дека е од голема важност секој граѓанин и политички субјект да ја има предвид и личната одговорност за историскиот момент што отвора економски и безбедносни перспективи за нашата држава и за граѓаните на Република Македонија.
Во разговорот, како што посочуваат, било изразено очекување дека Македонија ќе продолжи со реформските процеси, посебно во делот на правосудството, што ќе придонесе во евроинтеграцискиот процес. Холандскиот амбасадор во оваа насока најавил експертска помош од Холандија за Македонија. Исто така изразено било и очекување дека Македонија во скоро време ќе стане 30-та земја членка на НАТО.
Премиерот Зоран Заев на денешната средба му заблагодарил на холандскиот амбасадор за принципиелната поддршка од Кралството Холандија на демократските процеси во Република Македонија, вклучувајќи ја и поддршката на принципиелно ниво на актуелниот политички процес значаен за членство на Македонија во ЕУ и НАТО.