По доцнењето на денешната главна расправа за случајот на СЈО „Тенк“, адвокатот Боро Тасевски се појави во судницата на Кривичниот суд.
Тој се извини на Судскиот совет, бидејќи како што образложи бил на друго рочиште каде што е единствен бранител. Најави дека на денешното рочиште нема да може да присуствува, нагласи дека писмено ќе го извести судот и веројатно ќе го повлече полномошното и повеќе нема да ја брани Јанкуловска од обвинение за нарачката на мерцедесот. Присуството на адвокатот Тасевски во судницата за предметот „Тенк“ следи откако му се јави ексминистерката Јанкуловска, за да ја пренесе пораката од судијката Кацарска дека ако не се појават двајцата адвокати ќе бидат казнети со високи суми, а на Јанкуловска ќе и беше доделен адвокат по службена должност.
Моментално, единствено адвокатката Сања Алексиќ ја брани Јанкуловска, по што продолжи и доказната постапка за „Тенк“ и се испрашуваат сведоци. Инаку, вчера истиот адвокат Боро Тасевски беше казнет со глоба од 1.000 евра, поради навреда на судот, кога беше отсутен како единствен бранител на поранешниот градоначалник на Гази Баба, Тони Трајковски, обвинет во случајот за уривањето на „Космос“ а СЈО го кодираше предметот како „ТНТ“.