Аероклубот во Тревизо и итлијанските медиуми ги објавија фотографиите на шесте патници кои загинаа во авионската несреќа кај Кожле. Со авионот кој патувал од Тревизо за Приштина, управувал претседателот на аеро клубот Франческо Монтањер. Во авионот се наоѓал и потпретседателот Дарио Бастасин, Лука Дале Муле, брокерот Анџело Калегари, Илариа Берти и Висар Бегај од Косово кој имал и италијанско државјанство. – објави 24 Вести.
Урнатиот авион бил регистриран во Германија, а пилотите ги имале сите потребни дозволи за летање. Од Тревизо полетале во 14 часот, а на аеродромот Александар Велики требало да слетаат за да наполнат гориво.
Последниот контакт со контролорите во Скопје го имале во 17 часот и 40 минути, по што авионот во 17.45 се изгубил од радарот. Според пишувањето на италијанските медиуми, авионот паднал на земја, по што експлодирал, а патниците и екипажот загинале на лице место.