Жителите на Старо Коњарево со протестен собир денеска побараа да престане сечата на шумата над нивното село на планината Беласица. Сметаат дека тоа е причина за загадување на водите кои доаѓаат од планината, но и стравуваат дека може да доживеат уште една катастрофална поплава како таа од 2004 година, кога селото беше затрупано со камења и отпад од планината Беласица.
Барањата на жителите, кои синоќа одржале собир, ги прочита Цветко Јакимов, кој истакна дека покрај неконтролираната сеча се соочуваат и со проблем на изградба на пат во шумата.
-Нема дрвна маса за експлоатација, а педолошкиот состав на тлото не овозможува никаков пристап до дрвната маса, а од местото Куманово со границата со Бугарија се наоѓа шума од габер, лешник и ниска букова шума, а западната страна е ограничена со стрмната страна на водотекот и карпесто тло на кое нема никаква дрвна маса за експлоатација. Самото земјиште во близина на изворите во местото Топлик е нестабилно, што се гледа од соголените површини од кои земјата се лизнала и со било какви градежни работи уште повеќе се пореметува статиката на земјиштето што доведува до потполно загрозување на снабдувањето на селото со вода, рече Цветко Јакимов.
На протестот присуствуваше и градоначалникот на Ново Село, Никола Андонов кој рече дека бараат од надлежните иституции да дојдат стручни лица и да видат дали е оправдано да се врашат такви активности над селото Старо Коњарево.
-Ќе направиме еден официјален допис до државната шумска инспекција, која има должност и обврска да дојде и да направи контрола и потоа да седнеме заедно и ќе разговараме, рече градоначалникот Андонов.
На протестниот собир говореа и други жители на селото Старо Коњарево кои се заканија дека нема да дозволат понатамошно сечење на шумата.