Прес конференција
Весна Стојанова Богоевска, портпарол на ОО СДСМ Велес
Велес, 06.07.2017
Почитувани граѓани,
По незаконски донесените Годишни планови за вработување за 2017 и 2018 година на ЛУ “ Народен музеј Велес ” и Локалната библиотека “ Гоце Делчев ” Велес, Општина Велес продолжува и понатаму преку кршење на законите да се обидува да вработува лица непосредно пред одржувањето на локалните избори закажани за Октомври.
Годишните планови за вработување за 2017 и 2018 година на ЈКП “Дервен” се спротивни на одредбите на Законот за вработените во јавниот сектор, член 20 – б ( став 1,2 и 4), во делот на законските преклузивни рокови, кои не се запазени. ЈКП “Дервен” ги пробива законските рокови за доставување на годишните планови за вработување.
Советот на Општина Велес, пак, исто така ги пробива законските рокови за разгледување и давање на мислење на годишните планови за вработување. СДСМ и Советничката група на Сојузот за иднината се спротивставија и воопшто не гласаа за вакви противзаконски документи, особено за годишниот план за вработување за 2017 година, за кој Министерството за информатичко општество и администрација требало да достави позитивно мислење, најдоцна до 31 Декември, 2016 година.
Ваквото неодговорно работење на ВМРО-ДПМНЕ во Велес завршува. Наскоро, граѓаните на Велес ќе гласаат за промени. Новата локална власт предводена од СДСМ, ќе работи исклучиво согласно законските прописи и рокови во интерес на граѓаните на Општина Велес, а ќе се покрене и ревизија на досегашното работење на општината.