Сезоната на капење на градскиoт базен во Крива Паланка отпочна кон средината на јули, а одговорните од Јавното претпријатие „Комуналец“ информираат дека годинава за обнова на базенот биле издвоени околу 200.000 денари.
-Средства за обновување на целиот комплекс на градската плажа се определени по претходна тендерска постапка. Направена е комплетна реконструкција, и тоа: поправка на подната површина со бетон, нанесен е слојлепак и извршено е фарбање на целиот базен. Обновени се туш кабините во помошниот објект, поставени се нови врати од страна на вработени во ЈП „Комуналец“, сектор -Паркови и зеленило во соработка со другите сектори од претпријатието, водовод и комунална хигиена, информира Драги Пејчиновски, раководител на секоторот Паркови и зеленило.
Во водата секојдневно се додаваат средства за хлорирање и одржување чиста вода за капење, согласно сите стандарди за користење на вода за капење на јавни места и базени.
-Постојано се врши и мерење на ПХ- вредноста на водата, температурата на водата во малиот и големиот базен се прилагодува, а по потреба се менува целата вода во базенот, додаде Пејчиновски.
Обновени се санитарните јазли, хортикултурно е уреден дел од базенот и насадени се цвеќиња.
-Базенот е достапен за капачите секој ден од 10 до18 часот, а влезницата е со симболична сума од 50 денари, рече Пејчиновски.