Хуманоста како највисока морална доблест не се учи, но се поттикнува, надградува и афирмира во интерес на пошироката заедница. Волонтерите на Црвен Крст од Виница веќе тринаесет години организираат летен камп заедно со своите истомисленици од повеќе општински организации, и во рамките на тој камп, преку низа групни активности во отсуство на технички помагала, споделуваат плодни искуства од својата работа како млади хуманисти, разменуваат идеи, а во исто време се едуцираат со помош на стручни лица кои во зависност од зацртаната мисија, им држат соодветни предавања.
Како што истакнаа организаторите, годинава на летниот камп учесниците кои на број се 60, имаат задача покрај се друго , да научат нешто повеќе за Виница, а сите нивни активности се поддржани од општината и од голем број приватни компании во градот.
Учесниците ги поздрави и градоначалникот на Општина Виница, Ивица Димитров заедно со Кирил Цоневски, секретар на ОО Црвен крст-Виница.