Околу двесте играорци и играорки на возраст од шест до четиринаесет години беа дел од првиот меѓународен фолклорен фестивал за деца што се одржа синоќа во Крива Паланка.
Фестивалската програма започна со орото „тројка”, ја отворија домаќините, членовите на културно-уметничкото друштво „8 Октомври” кое работи под патронот на Националната установа Центар за култура Крива Паланка, организатор на фестивалот.
„Културата, јазикот и верата се основни одбележја кои не одржале низ вековите. Горди сме на младите генерации кои ги негуваат и продолжуваат вековните традиции.“ – напиша на својот ФБ профил првиот човек на општината Борјанчо Мицевски кој и го отвори фестивалот.
Меѓународниот фолклорен фестивал за деца е поддржан од Министерството за економија како проект од областа на туризмот, со цел пошироката домашна и меѓународна јавност да се запознае до орото, мелосот од овој крај , што придонесува за развој на туризмот.
Во продолжение погледнете дел од фотографиите од атмосферата на фестивалот!
