По 14-ти пат, улиците на Крива Паланка беа обоени во прекрасните колоритни носии на фолклорните танчери од Северен Кипар, Турција, Србија, Бугарија и Македонија, учесници на годинашниот Меѓународен фолклорен фестивал „Св.Јоаким Осоговски“.
Свеченото дефиле отпочна во населбата Осичка маала, кај м.в. Три срца, а звуците на традиционалните инструменти од разни краеви на Балканот и регионот, одекнуваа низ Осоговските планини, привлекувајќи бројни посетители, публика и туристи, намерници кои ја проследија првата фестивалска вечер.
Сцената лоцирана на централниот градски плоштад во Крива Паланка беше место на кое секој би посакал да биде овие три дена на одржување на фестивалот, кој, според градоначалникто на Крива Паланка, Борјанчо Мицевски, деновиве е срцето на Балканот.
-Велат , оној којшто игра и пее, зло не мисли., Ние, како домаќини, сме тука да ве прифатиме расположени да Ви ја подадеме нашата рака на пријателство, а вие пак, не бидете скромни и украдете драги спомени до нашито град, кој иако е мал, ние носиме топли срца и можеме да Ви подариме многу љубов, која со спомените кои ќе ги понесете оттука, ќе биде мост на едно пријателство кое ќе го градиме и во иднина, рече Мицевски.
На првата фестивалска вечер, настапија девет ансамбли и друштва: културно –уметничко друштво „8-ми Октомври“, Крива Паланка, „Lefkoşa Folklore Association -FOLK-DER“, Северен Кипар, КУД „ Запис“, Трстеник, Република Србија, КУД „Младост “, Ковин, Србија, КУД „Кочо Рацин“, Скопје, „Búyúkkabaca Belediyesi 7 Bölge Dans Grubu“, Турција, Фолклорен ансамбл „ Босилеград“ од Босилеград, Србија, КУД „Злетовски рудар“, Пробиштип и КУД „ Ново Селиште“, Бор, Република Србија.
Мицевски истакна дека фолклорот и традицијата, културното наследство на една држава се мостот помеѓу минатото и иднината.
-Фолклорот се нарекува срце и душа на еден народ, претставувајќи го она што е бтие на нацијата. Овие три дена Крива Паланка ќе биде срцето на Балканот, затоа што претставниците на државите кои на оваа сцена ќе настапат, вортуозите на танцот, на Бугарија, Србија, Турција, Кипар, нашите претставници од повеќе краеви на Македонија, ќе ги пренесат преку вештините и знаењета, низ игрите и танците, фолклорот и традицијата, но и срцето и душата на своите држави, рече Мицевски.
Фестивалот продолжува со прием на делегациите на учесниците кај градоначалникот денес во 11 часот,продолжува со дефиле кое ќе отпочне во 17 часот од населба Бавчалак, а фестивалската програма на градскиот плоштад е со почеток во 17 часот и 30 минути.
На Втората фестивалска вечер настапуваат: КУД „Лаза Нанчич“ Вршац, Србија, КУД „Актавис“ , Дупница, Р.Бугарија, „Вúyúkkabaca Belediyesi 7 Bölge Dans Grubu“, Турција, КУД „ Мз.Ново Селиште“, Бор, Србија, КУД „Фолклористи“, Крива Паланка, КУД „Младост “, Ковин, Србија, Асоција за фолклор “ Плетенка“, Битола и „Lefkoşa Folklore Association -FOLK-DER“, Северен Кипар.
Вечерва е традиционалниот “Jouyfest” на кој ќе насптапи легендарната југословенска група “Рибја Чорба”, додека во понеделник е предвиден настап на Јелена Томашевич. И двата настана ќе бидат оддржани на градскиот плоштад во Крива Паланка.