Основниот суд во Приштина одреди притвор во траење од еден месец за полицискиот истражител Раде Басара, кој беше уапсен во средата, поради обвинение за поврзаност со убиството на политичарот Оливер Ивановиќ.
Одделот за тежок криминал на Судот во Приштина соопшти дека е прифатено барањето на Специјалното обвинителство за одредување на мерката притвор за Басара и оценил дека се исполнети условите за изрекување на мерката, „поради постоење на околности кои наведуваат на опасноста од бегство на осомничениот“.
Обвинението го товари Басара за „учество или организирање на злосторничка група“ и „злоупотреба на службената позиција или авторитет“, според Кривичниот закон на Република Косово.
Оливер Ивановиќ, еден од лидерите на косовските Срби, беше убиен на 16 јануари 2018 година во Северна Митровица, во близина на неговиот дом, пред седиштето на неговата партија – Граѓанска иницијатива на Србија, демократија, правда (СДП).