Тројната коалција за која се во тек преговори помеѓу Движењето БЕСА, Алијанса за Албанците и Алтернатива е формула за сигурна победа во албанскиот блок на наредните предвремени парламентарни избори предвидени за 12 април, оцени денеска пратеникот од БЕСА Фадил Зендели.
Тој изјави дека Движењето БЕСА на последниот состанок на Централното претседателство што се одржа во вторникот уште еднаш потврдиле дека се за тројна коалиција меѓу Движењето БЕСА, Алијанса за Албанците и Алтернатива. Очекуваат одговор од Алијанса за Албанците и Алтернатива во насока на, како што рече, реализирање на мисијата што ја поставиле.
– Од Алтернатива имаше разни изјаснувања од нивни функционери, но нема изјаснување од нивните партиски структури. Очекувам дека нивните партиски структури ќе рефлектираат во насока на она што е интерес на сите три политички партии. Овие три политички партии како основа на своето функционирање го имаат менувањето на политичката клима, посебно кај Албанците во Северна Македонија, да има промени во албанскиот блок, рече Зендели. Тоа, додаде, е заедничка основа, база кон која сите три политички партии можат да се стремат и да соработуваат.
Зендели потенцира дека се подготвени да разговараат со Алтернатива на највисоко политичко ниво на средба, а досега имале индивидуални контакти. Од Алтернатива, истакна, нема конкретен одговор, се разговара, а од Алијанса за Албанците има подготвеност.
Алијансата за Албанците, како што изјави пратеникот Сурија Рашиди, сериозно пристапува кон овој процес и смета дека треба да има соработка и коалиција меѓу трите партии, со цел, како што рече, да не дозволиме парцијализација на гласовите кај Албанците.