Очекував во секоја секунда да го изгубам животот. Чувствував страв, животот ми беше загрозен, изјави денеска во Кривичниот суд премиерот Зоран Заев.
Тој денеска се соочи со Илија Петрушевски, кој е обвинет за кривично дело насилство во Собранието на 27 април 2017 година. Премиерот по извинувањето од Петрушевски кажа дека нема да бара отштета, а од судот побара да го има предив социјалниот аспект, како и сите околности и да донесе правична одлука за она што се случило.
Заев по сведочењето истакна дека очекува правичен систем што ќе води сметка со санкцијата да се испрати порака никогаш повеќе да се не повтората дела како што беше насилството на 27 април.
„Очекувам социјалниот аспект и судот да го има во предвид, јас не побарав никаква штета ниту надомест на штета од страна на обвинетите лица во овој случај. Секако одмереноста на крајот останува на судот. За мене е многу значајно судот да дели правда имајќи ги сите овие аспекти предвид и верувам дека и граѓаните тоа го очекуваат. Нема да го вратиме ние времето. Секако ако би можеле да го вратиме тогаш најголемата добивка ќе биде да не се повтори делото односно да не го направи некој тоа. Но, имајќи предвид дека нема да го вратиме времето, можеби ние ќе останеме со нашите лузни, но да внимаваме на тоа, на децата да не оставаме лузни, заради тоа што се работи на родители на деца“, изјави Заев.