2021 ќе биде година на заздравување на економски план, уверува премиерот Заев. Наредната година од државниот буџет најмногу пари ќе се трошат во здравството и економијата. Државата планира да потроши 4 милијарди евра, а во државната каса да се слеат 3,4 милијарди евра. Ако кризата со пандемијата се продлабочи власта има обезбедено и 50 милиони евра, како буџетска резерва.
374 милиони евра се предвидени за капитални проекти догодина, или за 20% повеќе од првично планираните за оваа. Најмногу ќе се инвестира во здравството, образованието, но и во патната и железничката инфраструктура.
Буџетскиот дефицит пак ќе надмине половина милијарда евра и ќе изнесува 4,9% од БДП. Министерот за финансии Фатмир Бесими вели дека задолжувањата ќе продолжат и во наредната година.
Владата предвидува здравствената криза полека да се стабилизира, па економијата догодина да порасне 4,1%.