На денешното продолжение од судскиот процес за трагедијата во клубот „Пулс“ во Кочани, каде пред една година загинаа 63 лица, сведокот Дарко Стојков, инспектор во подрачната единица на Дирекцијата за заштита и спасување (ДЗС) Виница, ги опиша сериозните пропусти во безбедносните стандарди на објектот.
Стојков, кој бил дел од екипата за увид во објектот заедно со тројца други инспектори, посочи дека во моментот на проверката во „Пулс“ имало само два противпожарни апарати, хидрантот бил празен, немало црево, ниту аларми за пожар, објави 4news.mk Задната врата била заклучена и запечатена, а прозорецот од женскиот тоалет имал решетки. Главниот излез немал ракофат за отворање кон надвор, а задната врата не ги исполнувала стандардите за евакуација, иако теоретски можела да се користи доколку не била заклучена.
Инспекторот посочи дека просторот до кој води задната врата бил тесен и завршувал на брег, што го отежнувало пристапот на Итната помош и Противпожарната служба. Стојков објасни дека објектот бил класифициран како со отворен пламен, кој се ширел брзо поради таванот и прозорците заѕидани со стиропор.
Тој истакна дека во објектот требало да има најмалку четири противпожарни апарати, според квадратурата, и дека пропустите не биле констатирани од ДЗС, бидејќи подрачната единица во Кочани повеќе од десет години нема вработен инспектор за заштита и спасување.
Стојков, одговарајќи на прашања на Обвинителството, објасни дека како инспектор од Виница немал надлежност да врши контроли во Кочани и дека за редовни и вонредни проверки била потребна наредба од генералниот инспектор или директорот на ДЗС.
Сведочењето исто така го открива недостатокот на институционален надзор во Кочани и потенцира дека овој пропуст го отежал превентивното спроведување на безбедносните мерки, што имало сериозни последици за безбедноста на посетителите на клубот.