Актуелниот директор во Фондот за здравство Сашо Стефановски вели дека досега не бил повикан на официјална средба од министерот за здравство Арбен Таравари во министерството за здравство, а на работа се појавува секојдневно, освен во периодот додека бил на одмор.
Оваа реакција следува, откако првиот човек во здравството рече дека Стефановски не оди на работа и не му се јавува на телефон.
– Ние во Фондот за здравство сме двајца директори. Откако новиот министер дојде, никој не се обратил до службите да не повика на официјална средба со него. Јас немам негов телефон и може ме барал, а јас на непознат број не сум се јавил. Ние во Фондот нашите задачи ги извршуваме редовно. Министерот кога и да ме повика ќе отидам на средба со него – изјави за „Фокус“, Стефановски.
Тој реагира дека, откако Владата одлучила да ги разреши членовите на Управните и Надзорните одбори, сега во Фондот нема кој да одлучува за жалбите на децата што треба да одат да се лекуваат во странство.