Сексуалните работници традиционално по 12-ти пат денеска во Скопје маршираа за поголеми права, еднаков третман пред законите и почитување на нивното право на слободен избор.
Маршот на црвените чадори започна од пред платото на спомен куќата на Мајка Тереза на улица Македонија, се движеше по плоштадот и камениот мост и заврши пред зградата Ибни Пајко. Тие бараат измени на законските регулативи кои ги криминализираат сексуалните работници.
После 12 години стигмата, дискриминацијата и насилството врз сексуалните работници се уште постои, а, како што порачаа учесниците на маршот, инстуциите и стручната јавност продолжуваат да бидат глуви и слепи за нивните барања.
Посочуваат дека анализите на граѓанските организации, во 2018 година биле документирани 100 случаи на насилство врз сексуални работници, додека во 2019 година бројот е помал, но тоа не се должи на позитивните промени, туку на обесхрабреноста и немањето доверба во институциите.
Маршот е во организација на граѓанската иницијатива за заштита, промоција и унапредување на правата на сексуалните работници СТАР-СТАР, во рамки на кампањата за одбележување на 17-ти декември, Меѓународниот ден за СТОП на насилството врз сексуалните работници.