Оризопроизводителите од Чешиново-Облешево ги извадија тракторите на улица. Во знак на предупредувачки протест денеска блокираа еден правец од патот помеѓу Кочани и Штип.
Револитрани се што доцни сеидбата и нема вода по нивите, за разлика од минатите години, кога до први мај веќе се било засеано. Побараа рестрикциите на вода соодветно да се распределат рамномерно по региони за да не останат многу производители без производство, а дополнително тие бараат и мерката за субвенција од 6 денари да не биде ограничена само на 800кг од декар.
-Десет пати се имам составено со министерот за земјоделие, се што кажа, се не излажа. Министерот што побргу да си даде оставка, да го нема, да го нема, бидејќи е најголем лажго, досега таков министер сме немале. А, прием бараме кај премиерот. Земјоделците од Чешиново – Облешево бараат прием кај премиерот, Премиерот да ги разбере овие наши работи, вели Коце Анѓелов, земјоделец од Облешево.
-Министерот и сите тие одговорни структури се служат со манипулација. Се што се кажа, се се излажа. Како се променија тие правила, како се променија тие субвенции не знаеме, меѓутоа тоа не е испочитувано, одлуката на Владата не е испочитувана, вели Ѓорѓи Каракашов од Национална земјоделска мрежа.
Во врска со исплатата на дополнителната субвенција за предадени количини оризова арпа, Трипуновски нагласи дека финансиската поддршка се реализира според планот и земјоделците ќе ги имаат парите на своите сметки токму кога најмногу им се потребни.