Судскиот совет тргнува во офанзива со цел завршница да добијат сите предмети кои застаруваат или пак останале нерешени.
Во изјава за Слободен печат, првиот човек на Советот, Киро Здравев, истакнал дека кон крајот на минатата година испратил циркуларно писмо до претседателите на сите судови, барајќи да се направи пресек до крајот на јули за сите вакви предмети, како и акционен план за тоа до кога предметите би се решавале во судска постапка. Здравев додаде дека на почетокот на месецов ќе бара отчет од претседателите на судовите, за тоа што досега е направено по неговото барање за активирање на застарените и нерешените предмети.
– И претходно правев посета за оваа цел по судовите низ државата, но поради корона-кризата се беше ставено на пауза. Сега се ажурираат податоците, а до средината на месецов повторно ќе остварувам средби со претседателите на судовите, за да ме информираат, има ли субјективни или објективни причини некој предмет да истане нерешен, посочил претседателот на Судскиот совет, Киро Здравев.
Тој не одговорил конкретно на прашањето дали врз Советот ќе падне товарот од најавата на премиерот Зоран Заев за ревизија на 5 проценти од сите судски предмети.
– Со новиот закон за Судски совет, кој стапи на сила на 30 мај годинава, ние имаме задача да ја оценуваме работата на судиите на секои четири години, а не како што беше претходно – на две. Оценувањето е врз основа на квантитативни и квалитативни критериуми и тоа квалитативните со 60%, а квантитативните со 40%. Сега се изготвува методологијата за исполнетост на критериумите во однос на квалитетот на судската постапка. Се предвидува оценката да се дава по пет предмети предложени од конкретниот судија и пет предмети по случаен избор од АКМИС системот – изјавил Здравев.
Претседателот на Судскиот совет објасни дека оценката ќе се дава со цел да се влијае при напредок во кариера, односно избор на судија во повисок суд.
– Доста е од избор на судии од тефтерчиња, време е за избор според квалитетот на постапката – заклучил претседателот на Судскиот совет, Киро Здравев.