По долга и тешка борба со ракот денеска почина еден од дојаените на македонската уметност, актерот Гоце Влахов, член на ансамблот на Македонскиот народен театар (МНТ). Неговото семејство соопшти дека погребот ќе се изврши на 30 јули во 11 часот на градските гробишта Бутел во Скопје.
Влахов беше студент на првата генерација актери на Факултетот за драмска уметност (ФДУ) во Скопје во 1971 година, заедно со Перо Арсовски, Мајда Тушар, Снежана Киселички, Соња Каранџуловска, Ѓорги Колозов, Кирил Псалтиров.
Од 1980 година до пензионирањето, Влахов е дел од Македонскиот народен театар, иако на оваа сцена игра бројни улоги од 1972 година.
Започна со „Крал Лир“ во 1972 година, потоа „Хелдерлин“ (1973 година), „Сезона на шампионите“ (1975) и „Славата и смртта на Хоаким Муриета“ (1975). Играл и во „Милион маченици“ (1980), „Војна и мир во Груда“ (1981), „Остен“, „По претставата“ (1981), „Габи“ (1982), Макавејските празници“, „Свирач на покрив“ (1983), „Воена тајна“, „Погрижи се за Амелија“ (1984), „Среќна нова 1949“, „Рамна земја“ (1985), „Тартиф“, „Гуштерица“ (1986), „Мрестење на краповите“, „Дон Кихот“ (1987), „Рави“ (1989), „Галеб“, „Посета на старата дама“ (1990), „Зора на истокот“ (1991), „МКС“ (1995), „Гроф Миливој“ (2001), „Болва в уво“ (2007) и последната „Троил и Кресида“ (2010).
Влахов играше и на филм, како што е„Македонскиот дел од пеколот“ (1971), „Јад“ (1975), „Илинден“ (1982), „Оловна бригада“ (1980), „Јуначко колено“ (1984), „Климент Охридски“ (1986), „Трст виа Скопје“ (1986), „Тврдокорни“ (1988), „Опстанок“ (1991), „Во светот на бајките“ (1995), „Погрешно време“ (2000), „Чекор пред времето“ (2003), „Андер“ (2004), „Бунило“ (2009).
Играше и во „Сенки“ (2007) на Милчо Манчевски, а во филмот „Мајки“ (2010) му беше последната филмска улога.
Македонската публика, секако највеќе го препознаваше по неговите актерски улоги во македонските народни приказни.
Вечна ти слава мајсторе!