– Она што можам да го најавам до земјоделците и до сите граѓани заинтересирани за аплицирање од мерките во ИПАРД програмата е дека веќе е проектиран 18 август како датум кога ќе бида распишан првиот повик од новата ИПАРД 3 програма за мерките 1 и 7. ИПАРД е нашата успешна приказна, нашиот најголем успех со кој сите треба да се гордееме .Како држава ние сме лидери во регионот со најголема искоритеност на ИПАРД 2 програмата од 98%, со склучени 2.369 договори и со нула евра поврат на средства од ИПАРД 2 програмата, информираше министерот за земјоделство, шумарство и водостопанство Љупчо Николовски.
– За голема почит е тоа што од овие 2.369 договори, дури 859 се млади земјоделци, чии инвестиции во земјоделството изнесуваат 9 милиони евра. Ова е потврда дека државата се грижи за младите и дава фер шанса. Дека младите сакаат да инвестираат и да ја градат својата иднина овде, дома во својата држава. Потврда исто така и дека мерките на министерството за поддршка на младите земјоделци дава резултат.
Овие средства од ИПАРД 2 програмата значат нови илјадници инвестиции, нови вработувања и зголемено производство, поголем рурален туризам и зголемена домашна економија, рече Николовски во гостувањето на МТВ.