Преку Програмата за рурален развој, која се спроведува од Агенцијата за финансиска поддршка на земјоделството и руралниот развој, од буџетот на Република Северна Македонија, обезбедени се финансиски средства од околу 38 милиони евра, за реализација на 202 проекти во сите општини и плански региони Со овие средства директно ќе се овозможи подобрување на условите за живот во малите општини и руралните средини.
Денес во Владата на Република Северна Македонија, вицепремиерот за економски прашања д-р Кочо Анѓушев, министерот за земјоделство, шумарство и водостопанство Љупчо Николовски и директорот на Агенцијата за финансиска поддршка на земјоделството и руралниот развој Николче Бабовски, доделија решенија од Програмата за рурален развој на дел од општините и планските региони.
Министерот за земјоделство, шумарство и водостопанство, Љупчо Николовски, посочи дека со денешното потпишување на решенијата се заокружува целата процедура и општините можат да пристапат кон спроведување на јавни набавки и склучување на договори за почеток на градежните работи за проектите.
„Програмата за рурален развој си го наоѓа своето место, а средствата од граѓаните надвор од она што го правиме во делот на ИПАРД ќе се слеваат во општините односно ќе бидат за капитални инвестиции коишто се потребни за граѓаните, за локалната самоуправа и за руралните средини, коишто ќе придонесат во делот на развојот на економијата, на земјоделството во регионите. Ова се дополнителни 38 милиони евра коишто ќе бидат инвестирани во капитални инвестиции за потребите кои се најважни за граѓаните“, изјави министерот Николовски.