Во планинските подрачја попладнево има нестабилна облачност, на места проследена со пороен дожд и грмежи, а во Скопската котлина дува засилен северен ветер, на моменти со брзина и до 75 км/час, соопшти Управата за хидрометеоролошки работи.
Попладнево ќе биде нестабилно со пороен дожд, засилен ветер и грмежи. Во вечерните и ноќните часови, се очекуваат пообилни врнежи од дожд (и над 30 л/м2), а на места ќе има и појава на невреме со електрични празнења, силен ветер и град.
И во Скопската котлина особено во вечерните часови ќе биде нестабилно со пороен дожд, грмежи и засилен ветер, локално и во форма на невреме.
Од УХМР во случај на појава на електрични празнења, препорачуваат поголема внимателност, да не се престојува на отворен простор и под осамени дрвја, а стадата животни да се групираат во помали групи.