Александар Нацев, член на ВМРО-ДПМНЕ, е неофицијално идентификуван како таен сопственик на Агенцијата за обезбедување „Рубикон“, за која Обвинителството ја прошири истрагата поврзана со трагичниот пожар во дискотеката „Пулс“ во Кочани, при што загинаа 62 лица, а над 200 беа повредени, дознава неофицијално „Фокус“.
Според Обвинителството, Нацев е осомничен за „Тешки дела против општата сигурност“, бидејќи раководел со целокупното работење на агенцијата, заедно со претходно осомничениот управител и овластеното лице од подружницата во Кочани. Истрагата укажува дека тие давале услуги на обезбедување за клубот без склучен договор, без безбедносна проценка и без план за противпожарна заштита.
Во ноќта на трагедијата, според обвинителството, агенцијата не ги контролирала условите во објектот – бил овозможен влез на малолетници, не се контролирала преполнетоста, а не бил спречен ниту внесот на пиротехнички средства со кои бил предизвикан пожарот.
Нацев бил лишен од слобода, а при претреси на локации во Скопје, Пробиштип и неговото возило, биле запленети документи и електронски уреди. Обвинителот поднесе предлог за притвор до Основниот кривичен суд Кочани.