Вицепремиерот за европски прашања Никола Димитров на вториот ден од Преспа форумот за дијалог оствари повеќе средби на кои во фокусот беа европското досие на Северна Македонија и проширувањето на Европската унија со земјите од регионот, како и меѓусебната поддршка за остварување на резултати во клучните области.
На средбата со шефот на полската дипломатија Збигњев Рау е потврдена принципиелната поддршка за конечен почеток на пристапните преговори на Северна Македонија со Европската Унија.
– Континуираната поддршка од Вишеградската група е мотивација за истрајност во напорите за остварување на европската перспектива на Северна Македонија и регионот, за што билатералната соработка и споделувањето на искуства има голема улога во таа насока, истакнал Димитров на средбата.
Од Секретаријатот за европски прашања попладнево информираа дека Димитров остварил средба и со австрискиот министер за надворешни работи со кого заеднички се согласиле дека европеизацијата на Северна Македонија мора да продолжи.
– Со мојот драг пријател и еден од нашите најголеми поддржувачи се согласивме дека европеизацијата на Северна Македонија мора да продолжи и дека е време за преминување кон следната фаза од процесот и одржување на првата меѓувладина конференција со ЕУ, што е од стратешки интерес и за Австрија и за ЕУ, нагласил Димитров.
Тој остварил средба и со министерката за надворешни работи на Косово, Доника Гервала Шварц на која е разговарано за потребата од заемна соработка и поддршка на земјите од регионот за остварување на европските аспирации и заеднички придонес кон стабилноста и безбедноста.
Билатерален состанок е одржан и со шефот на црногорската дипломатија, Ѓорѓе Радуловиќ, на кој е потенцирана одличната билатерална соработка, како и заедничките погледи за иднината и просперитетот на регионот.
Димитров, како што информира СЕП, бил дел и од трилатералниот состанок со амбасадорката на САД, Кејт Брнс и естонската амбасадорка Кристи Карелсон, на кој е разговарано за проектот за дигитализација на Северна Македонија што ќе биде спроведен во директно партнерство со Естонија.
– Нашата визија кон иднината подразбира и ориентираност кон теми како што е дигитализацијата што се наметнува како хоризонтален процес од којшто ќе зависи напредокот во многу клучни области. Имаме чест да учиме од дигиталните шампиони на Европа – Естонија, со директна поддршка на нашите важни стратешки партнери – САД, вели Димитров.
На маргините на Преспа Форумот, Димитров имал средба и со генералната секретарка на Советот на Европа, Марија Пејчиновиќ-Буриќ, на која е разговарано за важноста на зајакнувањето на споделените вредности од областа на човековите права, демократијата и владеењето на правото во рамки на оваа пан-европска организација, од кои потекнуваат и одредниците во клучните области од процесот на европската интеграција.