Бугарија се премисли. Нема да го номинира бизнисменот Орце Камчев, осомничен во случајот „Империја“ и сведок во аферата со рекетот, за почесен конзул во Македонија, пренесе Канал5.
Бугарскиот вицепремиер и министер за одбрана Красимир Каракачанов во интервју за Канал 5, вели дека ваквата одлука ја донеле по реакциите во македонската јавност и противењето на владата.
Минатата година Камчев беше номиниран за бугарски почесен конзул, со аргумент дека тој е човек кој економски е многу влијателен, има свој авторитет во Македонија. Но кога македонските власти не ја поддржаа таа идеја, како што гледате Бугарија не го отвори тоа прашање, бидејќи како што гледате се работи за граѓанин на Р. Македонија. Инаку Бугарија го номинира, но кога Македонија кажа дека тој не е прифатлив за нас, нема проблем, на крај го имаме на ум вашето мислење.
Каракачанов вели дека со внимание ја следата аферата „Рекет“, но ги демантира сите шпекулации за некаква поврзаност на Бугарија со случајот.
Такво нешто нема, кажувам најодговорно. Не сакам да навлегувам во детали но кажувам дека Бугарија не учествува во тој внатрешно – политички проблем на Македонија. Каде се наоѓа во моментов господинот Камчев јас не знам. Но дефинитивно тој скандал создава реакција во Македонија.
Дека Бугарија и тамошниот премиер Бојко Борисов немаат никаква врска со случајот, тврдеше и премиерот Зоран Заев во интервју за бугарската БГНЕС.
Целта и на двете земји како што рече премиерот Заев е Македонија и Бугарија да ги продлабочуваат добрососедските односи.