Недоволната соработка на странските инвеститори со домашните компании и недостигот на квалификуван кадар остануваат клучни предизвици за развој на техничко-индустриските зони во земјава, рече вицепремиерот Кочо Анѓушев пред почетокот на денешниот Европски самит на слободни зони што се одржува во Скопје.
Зоните, според Анѓушев, направија голем исчекор во развој на нашата индустрија, но има уште многу простор да се работи на ова поле.
-Како економијата да биде повеќе поттикната од странските инвестиции и соработката со домашните компании да биде поголема, но и како да привлечеме компании што носат повисок технолошки развој, даваат повисоки плати и вработуваат високообразуван кадар, е клучниот предизвик. Простор за напредок има во делот на компаниите фокусирани на готови производи што одлучуваат од кого ќе купуваат компоненти. И тука нашите фирми треба да ја искористат можноста. Но, пречка има кај оние кои се во средината на синџирот на снабдување, а одлучуваат да направат некакви измени во програмата, па треба да бараат дозвола од крајниот корисник, истакна вицепремиерот.
Тој смета дека со раздвижувањето на индустријата, што, како што рече, е евидентно и со позитивните трендови во градежништвото, земјоделството и трговијата, може да се очекува растот на БДП да биде значително над планираниот.
Во однос на немањето доволно квалификуван кадар, Анѓушев потсети дека годинава Владата одвои над 20 милиони евра наменети за преквалификација на невработените лица.
-Структурата на невработените кај нас во моментов не дозволува тие веднаш да бидат вклучени во индустријата поради што е нужен процес на преквалификација, подвлече Анѓушев.
Се осврна и на поволностите што ги нуди земјава за странските, но и за домашните инвеститори, потенцирајќи дека сега условите се изедначени.
-Индустриските зони направија голем исчекор во развојот на индустријата и затоа Владата реши да ги поддржи, но на поинаков, транспарентен начин. Со закон понуди еднакви услови за домашните и странските вложувачи, нагласи Анѓушев.
Во обраќањето пред присутните претседателот на Светската организација на слободни зони Мохамед Ал Зарони, ја пофали Дирекцијата на трговско индустирските развојни зони во земјава. Рече дека нуди максимално поедноставени административни процедури што е клучно за инвеститорите и ја квалификува како извонреден пример за визија и оперативност.