Прес конференција
Весна Стојанова Богоевска, портпарол на ОО СДСМ Велес
Велес, 06.09.2017
Почитувани граѓани,
Училиштето во село Клуковец е уште едно од многубројните лажни ветувања на локалната власт предводена од Славчо Чадиев и ВМРО-ДПМНЕ.
Учебната година во ова село не започна навреме, учениците се дома, а училишната зграда е празна. Причина за тоа е катастрофалната состојба на објектот кој и покрај бројните ветувања на локална власт, се уште не е реконтруиран.
Сепак, тоа не беше причина за Чадиев во својот таканаречен отчет бесрамно да наведе дека ги реконструирал покривот и прозорците на училиштето во Клуковец.
Го повикуваме Чадиев да каже дали знае дека учениците во село Клуковец не посетуваат настава и дали ја знае причината зошто учениците не посетуваат настава?
Да се фали Чадиев, на страница 26 во својот отчет дека го реконструирал училиштето, а во исто време учебната година да не започне навреме, е неодговорно и безобразно.
На Чадиев му е побитно книгата наречена Отчет за четири години да изгледа што поголема, отколку да се справи со вистинските проблеми и да создаде нормални услови за учениците да посетуваат настава.
Учениците и жителите на Клуковец не заслужуваат градоначалник и Совет кои ќе ги игнорираат нивните потреби. Граѓаните на општина Велес не заслужуваат ваква неодговорна и неспособна локална власт.
Затоа, на претстојните локални избори, граѓаните ќе изберат нова локална власт предводена од СДСМ, којашто ќе стави крај на лажните ветувања и одговорно ќе раководи со општината.