Општина Крива Паланка е позната по уредувањето на јавните површини под зеленило и со право важи за еден од градовите со најголеми зелени површини во Македонија. Таква е приказната и со новиот парк кој се наоѓа на почетокот на самиот пат кој води кон нашиот бисер, манастирот Св. Јоаким Осоговски.
Паркот е дело на невладината организација Центар за младински иницијативи ЦИК – ЦАК од Крива Паланка, која во рамките на проектот “Од младите со срце за Крива Паланка” и со помош на околу 20 млади волонтери го разубавија овој дел од градот. На локацијата се уреди парк на површина од 230м2 со поставување на урбана опрема, клупи и канти за отпадоци, а дополнително посадени се и дрвца за разубавување на амбиентот.
Целта на проектот е на градот да му се даде еден нов лик преку уредување на запуштени површини, но и ширење на нов тип на уметност, сето тоа преку младинско волонтерско учество.
На самиот локалитет, младите волонтери, предводени од уметникот Роберт Цветковски, изработија и мурал од 50м2, чија цел е да ја прикаже разликата во квалитет на живот помеѓу живот со зачувана природа наспроти тешката индустрија со која секојдневно живееме.
Во рамките на проектот се спреведе активност и за значајноста на волонтерството и значајноста за активното вклучување на младите во активностите кои придонесуваат кон развојот на општеството.
За жал во период на ниски температури, сега засега, не можеме да се радуваме на живоописната трева, но, со нетрпение ја очекуваме пролетта и овој парк да прерасне во, како што велат од организацијата, вистинско младинско катче.
На крај, на волонтерите, од страна на организацијата им се поделила благодарници за учество во проектот.
Проектот се спроведува во рамките на регионалната програма за локална демократија во Западен Балкан 2 – ReLOaD2, која е финансирана од Европската унија (ЕУ), а ја имплементира Програмата за развој на Обединетите нации (УНДП). Проектот “Од младите со срце за Крива Паланка” е кофинансиран од Општина Крива Паланка.
За повеќе информации во врска со проектот ReLOaD2 можете да најдете тука.
