Здружението „Хендикеп плус“ во соработка со Општина Штип започнуваа со проектот „Заедно за инклузивна општина“. Овој проект изминатиот период успешно се реализираше и во Крива Паланка.
Бранкица Димитровска од Здружението „Хендикеп плус“ изјави дека целта на проектот е насочена кон обезбедување на социјални промени во Општина Штип, а иницирани од лицата со попреченост за потранспарентно, одговорно и инклузивно владеење на локално ниво.
-Општина Штип е втора на којашто Статутот ќе биде со гестовен јазик за глувите лица, а сега ќе го прикажеме и во аудио-визуелна форма, а исто така во другиот дел од проектот се планира Статутот да биде на Брајово писмо – писмото за слепите лица. Сакаме да кажеме дека пристапноста не се само рампите до институциите, туку и пристапноста до документите, до Статутот, вели Димитровска.
Таа додава дека лицата со попреченост треба да бидат вклучени и во донесувањето на одлуките, меѓу кои и кога се прави буџетот на Општината.
Проектот се финансира преку Програмата за развој на Амбасада на Бугарија.
На настанот во Штип присуствуваше и амбасадорот на Бугарија, Жељаско Радуков, кој изјави дека оваа Програма обезбедува средства за реализација на проекти за лицата со посебни потреби, но и за реконструкции на училишта, градинки и други објекти.
-Секоја година нашата помош преку Програмата за помош и развој изнесува околу еден милион евра. Овие пари се обезбедени за финансирање за различни проекти. Бидејќи сум нов амбасадор ова ќе ми биде прво соочување со реализацијата на оваа Програма, а наскоро ќе ги презентираме сите нејзини можности, вели Радуков.