Хрватската Влада денеска донесе одлука за создавање на Совет за соочување со последиците од владеењето на недемократските режими, кој подолг период е познат како Комисија за соочување со минатото.
Премиерот Андреј Пленковиќ денеска изјави дека „Хрватска се уште се соочува со последиците од недемократските режими“.
– Има различни интерпретации за минатото, кои не секогаш се засноваат врз научни истражувања и експертски дискусии, истакна Пленковиќ.
Таквиот чекор на Владата во Загреб предизвика критики од страна на либералите и на еврејските групи, кои сметаат дека на тој начин се изедначуваат пронацистичкиот режим за време на Втората светска војна и повоениот комунистички режим.
На чело на Советот е назначен претседателот на Хрватската академија за наука и уметности, Звонко Кусиќ, а составен е од правници, историчари, политиколози и други експерти „кои претставуваат релевантни хрватски институции“.
Десетици илјади Срби, Евреи и Роми беа убиени во Хрватска за време на Втората светска војна пред земјата да стане дел од повоената комунистичка Југославија.