Кире Лазаров се врати на првото место на листата на стрелци на Светското ракометно првенство во Франција. Со десетте гола против Ангола, македонскиот капитен има вкупно 22 по два одиграни меча во Мец, девет повеќе од Уве Геншајмер кој допрва треба да настапи во второто коло на турнирот.
Срцето на „црвено-жолтите“, како што Веселин Вујовиќ го опиша значењето на Лазаров за репрезентација на Македонија, потенцира влезот против Ангола не бил согласно договорот. Но, настаните на теренот набрзо потоа почна да добиваат посакуван правец.
„Нервозата на почетокот сами ја направивме. Промашивме шест-седум зицери, направивме две-три технички грешки. Но, потоа работите си дојдоа на свое место. Против условно речено поголеми репрезентации тоа не треба да се случува“, беа првите впечатоци на Лазаров по Ангола.
Македонската репрезентација има ден пауза на првенството. Наредниот дуел е закажан за понеделник (17,45 ч.) против Словенија на чија клупа е Веселин Вујовиќ и која по две одиграни кола е лидер во групата Б со исто ефект како „црвено-жолтиот“. Словенците во првото коло ја декласираа Ангола (42:25), во второто го совладаа Исланд со гол разлика (26:25).
„Нема што да загубиме со Словенија. Фаворитската улога ја предаваме. Беа на Олимјадана, поискусни се, имаат подолга клупа, повеќе време се заедно, играат во добри клубови. Како што се договоривме пред првенството, ние ќе одиме чекор по чекор. Секој натпревар е засебен, различен и тежок сам по себе. Наше е да се обидеме да изненадиме со храбра и пожртвувана игра“, додаде најдобриот голгетер на шампионатот засега.
Фото: francehandball2017.com
Червар: Меѓу Словенија, Шпанија и Исланд ќе настрада некој, кој ќе биде ќе видиме
И селекторот Лино Червар го нагласи опуштениот и нервозен почеток против Ангола. Се случи и покрај неговите предупредувања и за среќа не траеше долго и не се одрази на генералниот впечаток и конечниот исход.
„Предупредив дека нема лесни мечеви. Секој е тежок и во секој треба да се пристапи сериозно што не беше случај на стартот со Ангола. Се чувствуваше и мала нервоза што резултира со неколку технички грешки и нереализирани зицери. Сепак, најважно е што победивме на крајот. Важни се резултатите, се бројат бодовите. Со четири по два меча пполесно се дише“, истакна предводникот на македонскиот тим.
Македонија ја исполни примарната мисија во групната фаза. Оствари две победи против Тунис и Ангола што ширум ѝ отвораат простор за осминафинале. Во наредните три меча останува борба за што подобра позиција на табелата, по можност избегнување на четвртото место што ќе значи и разминување со домаќинот Франција.
„Остануваме аутсадери и во наредните три средби пред нас како што бевме и пред мечот со Тунис. Малите репрезентации мора да покажат срце. Се надевам дека македонското ќе дојде до израз и некоја од селекциите на Словенија, на Шпанија и на Исланд ќе настрада. Која ќе биде ќе видиме. Сите тие се силни, но ние мора да играме и со срце и со глава“, порача Червар.