Министерството за внатрешни работи преку соопштение информираше дека презема мерки и активности за расчистување на настанот што бил пријавен вчера во СВР Тетово за сторено кривично дело нудење поткуп од страна на две лица.
Вчера едно лице до СВР Тетово поднело кривична пријава според која две лица С.Ш. и Ф.И. во вечерните часови му понудиле нему и на уште неколку семејства во село Теарце од 100 до 500 евра за еден гласач, за да не го остварат своето избирачко право.
„Утврдено дека на 22 декември лицето С.Ш. дошло во домот на пријавителот, ги побарало личните карти од членовите на неговото семејство кои имаат право на глас и побарало да не гласаат за што ќе му бидат дадени парични средства. Пријавителот не ја прифатил ваквата понуда“, информираат од МВР:
За поднесената пријава е известен дежурниот јавен обвинител при ОЈО Тетово, кој наложил да се повикаат лицата на испрашување.
„Притоа, од страна на ОЈО Тетово на началникот СВР Тетово му се дадени насоки лицата што се посочени во записникот како сведоци и можни сторители да не се повикуваат во СВР Тетово во текот на вчерашниот и денешниот ден за да не се прекине изборниот процес, а со постапката да се продолжи од понеделник, 26 декември 2016 година“, додаваат од МВР.