По изјавите на градоначалникот на Крива Паланка, Борјанчо Мицевски дека постојат сомнежи за сопственоста на компанијата Веибо груп и дали воопшто тоа е некаква странска инвестиција или е фирма која е во сопственост на фамилијата Камчеви, извинување или докази дека тоа е навистина така побара компанијата Орка Холдинг на Орце Камчев.
Од друга страна пак кривопаланечката јавност добро знае дека пред да се појави Веибо груп, во Крива Паланка работеше компанија која беше во сопственост на фамилија Камчеви.
Од кабинетот на градоначалникот доставија документацијата со која тврдат дека според нив Мицевски е во право. На сликите подолу се гледа дека навистина компаниите ДПТУ КАРА АД Скопје застапувана од управител од фамилијата Камчеви и ДПТУ МОНТ ДООЕЛ Скопје, и двете на иста адреса на регистрација на ул.Скупи бр.3А, Скопје, склучиле договор за регистрација на Друштво со ограничена одговорност со име Веибо гармент продакшн Македонија ДОО.
Од општината тврдат дека истата оваа новоформирана компанија е заведена во катастарскиот план на општина Крива Паланка на ул. Индустриска бр. 9, на парцела на која се наоѓаше и поранешната компанија на фамилијата Камчеви, а каде што сега своите економски активности ги изведува новоформираната компанија, Веибо гармент продакшн Македонија.
Според нив, дека се работи за истите простории во кои работи сегашната компанија и дека тоа е истата компанија која е основана од страна на ДПТУ КАРА АД Скопје и ДПТУ МОНТ ДООЕЛ Скопје, покажуваат и матичниот број 6989136 под кој субјектот е заведен во централниот регистар на Република Македонија а тука приложен во имотниот лист број 9997.
Кога од општина Крива Паланка до компанијата ДПТУ КАРА АД Скопје пак изготвиле и доставиле решение за наплата на данок на имот, од компанијата доставиле изјава со која велат дека недвижниот имот, предмет на оданочување е оттуѓен, односно истиот е пренесен на компанијата ДПТУ Веибо гармент продакшн Македонија ДОО Крива Паланка.
Во прилог на ова е и веб страницата на Веибо гармент продакшн Македонија на која се потврдува дека ги користи истите простории кои ги користеше поранешната компанија на фамилија Камчеви.
http://www.weibo-garment.com/ – веб страницата на Веибо гармент продакшн Македонија
Дополнително на ова е и фактот што на самата веб страница на компанијата матичниот број е 6989136, истиот оној кој е заведен како матичен број на компанијата која е основана од ДПТУ КАРА АД Скопје и ДПТУ МОНТ ДООЕЛ Скопје, прикажан и во имотниот лист и на самата веб страница, стои во реакцијата од општината.
http://www.weibo-garment.com/about/
Следејки ги овие документи се поставува прашањето дали компанијата во Крива Паланка сепак е некаква турска инвестиција или пак е компанија која припаѓа токму на фамилијата Камчеви?